January 18 - විමලරත්න කුමාරගම කිවිඳුන්ගේ ජන්ම දිනය

කොළඹ යුගයේ දෙවන පරපුරට අයත් ප්‍රතිභාසම්පන්නම කවියෙකු ලෙස හැඳින්වෙන විමලරත්න කුමාරගම මහතා උපත ලැබුවේ වර්ෂ 1919 ජනවාරි මස 18 වැනිදා පාතදුම්බරදීය. මහනුවර වේරපිටිය විදුහලෙන් මූලික අධ්‍යාපනය හදාරා ධර්මරාජ විද්‍යාලයෙන් අධ්‍යාපනය නිමාකරන එතුමා වර්ෂ 1935 දී අනුරාධපුර කච්චේරියේ ලිපිකරුවෙකු වශයෙන් රාජ්‍ය සේවයට එක්විය. පසුව වර්ෂ 1944 දී ආදායම් පාලකවරයෙකු වශයෙන් උතුරුමැද පළාතේම සේවයට එක්වූ එතුමා කවියට මෙන්ම වන්නියටද පෙම් බැඳි කවියෙකු ලෙස ප්‍රකට විය.
සරල සුගම බස් වහරක් යොදාගනිමින් එතුමා විසින් රචිත “අයියනායක, සංවේග වේදනා, ඔරුව, මෝල් පූජාව, හේරත් හාමි, ආරච්චිරාල, වන්නියේ දොස්තර” වැනි පද්‍ය නිර්මාණ එතුමා සේවය කල එම දුෂ්කර පළාතේ කටුකත්වය මෙන්ම එහි ගැමියන්ගේ ජීවිතවල සුන්දරත්වය ද මනාව පෙන්නුම් කරයි. වර්තමාන තරුණ පරපුර විසින්ද සොයා යායුතුම කවියෙකු වන විමලරත්න කුමාරගම මහතා වසර 43ක් ආයු වළඳා වර්ෂ 1962 දෙසැම්බර් මස 30 වනදා මෙලොව හැර ගියේය.